ҚОҒАМДЫҚ ОРЫНДА ҚЫЛМЫС АЗАЙҒАНЫМЕН…

Былтырғы жылдың қорытындысында қаламызда қоғамдық орындарда жасалған қылмыстар саны азайған. Бұл туралы Екібастұз қаласының әкімшілік полиция басқармасы бастығының міндетін атқарушы Руслан Сүлейменов баяндады. Оның айтуынша, көшеде тіркелген қылмыстар саны 100-ден 85 дерекке дейін төмендеген.
2025 жылы Екібастұз өңірінде 263 жол-көлік оқиғасы тіркеліпті. Соның салдарынан 16 адам қаза тауып, 383 адам түрлі дәрежеде жарақат алған. Бұл көрсеткіш 2024 жылмен салыстырғанда жоғары.
– Жол қауіпсіздігін тұрақтандыру мақсатында полиция қызметкерлері алдын алу шараларын күшейтті. Осы мақсатта «Құқықтық тәртіп», «Қауіпсіз жол» секілді жедел-профилактикалық іс-шаралары өткізілуде. 2025 жылы ұрланған көліктерді анықтау және қылмыскерлерді ұстауға бағытталған 16-дан астам іс-шара ұйымдастырылған. Оның 12-сі күндіз, 4-еуі түнгі уақытта өткізілді, – дейді Р.Сүлейменов.
Азаматтарды ақпараттандыру және құқық бұзушылықтың алдын алу мақсатында түсіндіру жұмыстары бұқаралық ақпарат құралдары мен әлеуметтік желілерде тұрақты жарияланып келеді.
Г.ҚУАТҚЫЗЫ