Абылай ханның ақ найзалы заманында ел тәуелсіздігі үшін болған шайқастарда қаһармандық үлгісін танытқан хас батыр Баян Қасаболатұлының есімі арада ғасырлар өтсе де қазақ халқының жадында. Соның айғағы – Екібастұз қаласында жыл сайын қазақ күресінен Баян батырды еске алу турнирі өткізіліп жүр. Биыл республикалық жарыс 22-23 қараша күндері «Жасыбай» спорт сарайында болып, оған еліміздің 6 облысынан жиналған 198 жас палуан қатысты.
Турнирдің ашылу салтанатында Екібастұз қаласы әкімдігінің мәдениет, тілдерді дамыту, денешынықтыру және спорт бөлімі басшысы Жанар Тоқсамбаева, Екібастұз қалалық қазақ күресі федерациясының төрағасы, кәсіпкер Орынбасар Әлеев сөз сөйлеп, ақын-жазушы Жұмағали Қоғабаев бата берді. Осыдан соң 2010-2011 жылдары туған кіші жасөспірімдер бозкілемдегі белдесулерге кірісті.
Жалпы, мұндай жарыстардың жас палуандардың шеберлігін шыңдауына септігін тигізетіні белгілі. Турнир қорытындысына келсек, жеңімпаздар мен жүлдегерлер қатарында №3 балалар мен жасөспірімдер мектебінің палуандары көп болды. Атап айтқанда, 42 кило салмақта Мейірбек Құрмаш – қола, 55 килода Нұрислам Назымбек – қола, 60 килода Ералы Мүбараков – күміс, 65 килода Ғалымбек Сәбит – қола, 70 килода Нұрасыл Ақан мен Айтуар Мұратбек – қола, 75 килода Саят Қуанышбек – алтын, Нұрлан Шапенов – күміс, 80 килода Руслан Абрамовский – күміс, Омар Сағындық – қола, 80+ килода Әли Төлеген алтын медаль иеленді. Сонымен қатар, 46 кило салмақта «Жасыбай» спорт мектебі тәрбиеленушісі Әділет Шүкірәлі турнир жеңімпазы атанды.
Ж.Бұланбай
