Әйелдерге қатысты кемсітушілікті жою туралы конвенция ережесіне сәйкес, жыл сайын 25 қарашада Халықаралық әйелдерге қатысты зорлық-зомбылық көрсетуді жою күні аталып өтеді. Акцияның мақсаты – әйелдерге қатысты зорлық-зомбылықты болдырмау және жолын кесу, ана мен баланы қорғау. Осы орайда облыс аумағында мемлекеттік органдар, үкіметтік емес және халықаралық ұйымдардың өкілдері біріге отырып, «Гендерлік зорлық-зомбылыққа қарсы 16 күн бойы белсенді іс-әрекет» акциясы жарияланды.
Акция аясында жәбірленушілер мен отбасылық-тұрмыстық құқық бұзушыларды заңнамалық өзгерістермен таныстыруға бағытталған көшпелі іс-шаралар ұйымдастырылуда. Кәсіпорындарда, ұйымдарда және оқу орындарында қоғамдық іс-шаралар (брифингтер, семинарлар, тренингтер, дөңгелек үстелдер және т.б.) өткізілуде. Тұрмыста құқық бұзушылық жасауға бейім адамдарды, сондай-ақ, жайсыз отбасыларды тұрғылықты жері бойынша тексеру жүргізілуде. Қиын жағдайға тап болған отбасыларға кешенді көмек көрсетіледі.
Статистикалық мәліметтерге сүйенсек, полицияға келіп түскен өтініштердің басым бөлігі отбасылық жанжалға, тұрмыстық зорлық-зомбылыққа қатысты екенін аңғаруға болады. Биылғы жылдың он айында өңірде 600-ге жуық шағым тіркелген. 380 материалға қатысты әкімшілік хаттамалар толтырылып, құқық бұзушылар заң алдында жауап берді. Теріс қылыққа қатысты 10 қылмыстық іс тіркеліпті, оның 5-уі қасақана денсаулыққа жеңіл зиян келтіру деп табылса, қалған 5-уі – соққыға жығу фактісі.
– Полиция қызметкерлері отбасылық жанжалға қатысты шақыртулар түссе, жедел әрекет етеді. Жыл басынан бері учаскелік полицейлер 803 қорғау нұсқамасын шығарды. Қорғау нұсқамасы талаптарын бұзған 91 адам жауапқа тартылды. 229 құқық бұзушыға ерекше талаптар белгіленді. 14 адамға психологиялық көмек көрсетілді, – дейді бұл туралы Екібастұз қаласы полиция басқармасының отбасылық-тұрмыстық зорлық-зомбылыққа қарсы күрес бөлімінің бастығы Бақытгүл Сейтқалиева.
Акция 10 желтоқсанға дейін жалғасады. Тұрмыстық зорлық-зомбылықтар туралы «111» бірыңғай сенім телефонына хабарлауға болады.
Гүлсана ҚУАТҚЫЗЫ
