Павлодар қаласындағы «Достық үйінде» аналар кеңесінің ұйымдастыруымен «Ана тәрбиесі – ұлт болашағы» атты облыстық форум өткізілді. Бұл игі шара Қазақстан халқы Ассамблеясының 30 жылдығына және Халықаралық балалар күніне орай ұйымдастырылды.
Форумға «Атамұра» мәдениет орталығына қарасты Қоянды ауылдық клубының мәдени ұйымдастырушысы, ұлттық тағамдарды насихаттаушы Қазынагүл Алпысбаева арнайы шақырылып, өз өнерін көпшілікке паш етті. Шара барысында ол «Ұлттық тағамдар қасиеті» атты көрме өткізіп, қалың көпшіліктің ықыласына бөленді.
Ұмыт бола бастаған ұлттық тағамдарды жаңғыртып, облыс және республика көлемінде насихаттап жүрген Қазынагүл Қылышбайқызы – қолөнер мен аспаздық өнерді қатар меңгерген шебер, «Кәусар» әжелер вокалдық тобының, «Алтын оймақ» үйірмесінің жетекшісі. Форумда ол бүгінде сирек дайындалатын «Ұлпершек» тағамын әзірлеп, қонақтарға ерекше дәм ұсынды. Сондай-ақ, дастарханнан әсіп, бүрмеқарын, бауырсақ, қазы-қарта, жал-жая, шұжық, балқуырдақ, айран, қымыз және басқа да ұлттық тағамдар мен сусындар орын алды. Дәмі тіл үйірер асқа риза болған қонақтар Қ.Алпысбаеваға жүрекжарды алғыстарын айтты.
Салтанатты шарада облыстық мәслихат депутаты Асылбек Туғанбай мен ақпарат және қоғамдық даму басқармасының басшысы Әлнұр Сейдуманов сөз сөйлеп, ұлттық дәстүрді насихаттауға қосқан үлесі үшін Қазынагүл Алпысбаеваға алғыс білдірді. Құрмет белгісі ретінде иығына шапан жауып, орамал тарту етті. Сондай-ақ, облыс әкімінің орынбасары А.Маликованың атынан бағалы сыйлық пен алғыс хат табысталды.
Қазақстан халқы Ассамблеясы облыстық Аналар кеңесінің және «НҰР-АНА әлемі» қоғамдық бірлестігінің төрағасы Бақытжамал Максилова өз сөзінде мұндай шаралардың жастарды біріктіріп, олардың тарихи құндылықтарды құрметтеп, ұқыпты сақтауға үлгі болатынын атап өтті.
– Форум мәнді де мағыналы өтті. Көрмені ұйымдастыруға, Павлодар қаласына жеткізуге көлікпен, қаржылай көмектескен «Атамұра» мәдениет орталығының директоры Нұрсұлу Төлеубаеваға, Қоянды ауылының әкімі Ержан Уразалиновқа, Қоянды ауылы мектебінің директоры Дархан Бәтеновке алғысым шексіз, – дейді
Қ.Алпысбаева.
Шара соңында көрмеге қойылған тағамдар қайырымдылық ишараты ретінде Павлодар қаласындағы «Аналар үйі» дағдарыс орталығына жеткізілді.
Гүлсана МЕДЕУБАЙТЕГІ
