20 қараша күні «Достық үйінде» «Ана ұлағаты» қоғамдық бірлестігінің ұйымдастыруымен «Отбасы құндылығы – басты байлық» атты танымдық кездесу өтті. Шараның негізгі мақсаты – қазақы тұрмыстағы ене мен келін арасындағы сыйластық мәдениетін насихаттап, ұлттық тәрбиенің маңызын кеңінен дәріптеу болды. Жиынға «Асыл әжелер» ансамблі, мектеп және колледж студенттері, ұстаздар қауымы қатысты.
Кездесу барысында қатысушылар өз әулеттеріндегі тәрбие дәстүрлері, келін мен ене арасындағы өзара құрмет жөніндегі пайымдарын ортаға салып, өмірден түйген өнегелі сөздерін айтты. Алғаш болып сөз алған Бикен Ахметова көпбалалы әулетке келін болып түскен жылдарын еске алды.
— «Ер азаматты сыйлаңдар, қадірлеңдер» деген анамның өсиеті менің бүкіл өміріме бағыт-бағдар болды. Сол сөзді бүгін өз балаларым мен немерелеріме де айтып отырамын. Әулеттің берекесі – ене мен келін сыйластығында, — дейді ол.
Бикен апай отбасының бірлігі мен үйлесімін сақтау үшін әр сөзін өнеге етіп, келіндерімен сыйластықта өмір сүріп келе жатқанын айтты.
— Үлкен келініммен 30 жыл, немере келініммен 3 жылдан бері жарасып өмір сүріп келемін. Кіші келініме де «жат болып кетпеуің үшін, ең кемі бес жыл бірге тұрамыз» деген едім. Бұл талап емес, мейірім мен сыйластықты бекіте түсудің жолы, — деген оның пікірі жиналғандарға үлкен ой салды.
Сөз кезегін жалғаған Ақкөл ауылының тумасы Сағира Кәрімжанова да өз шаңырағындағы тәрбие дәстүрлері жайында жүрекжарды пікірін білдірді.
— Әр отбасының өз ұстанымы бар. Біздің келіндеріміз үлкен кісілер келгенде міндетті түрде сәлем салады. Осыны үйретіп едім, олар қуана қабылдады. Келінге қатал талап қоюдан бұрын, оған мейірім танытып, ақыл айтып, бағыт көрсету керек. «Келін ененің топырағынан» дейді ғой. Енем маған қандай өнеге қалдырса, мен де келіндеріме сондай жол көрсеткім келеді. Үйге келген қонақтың алғысы мен батасы – әйел адамның ең үлкен қуанышы, — деп тәжірибесінен түйген тағылымды ойын жеткізді.
Кездесуге қатысқан Қоңырша апай да өз естеліктерімен бөлісті. Ауырған енесін күткен күндерін еске алып, енесінің разы болып батасын беріп, қолындағы сақинасын табыстаған сәті өміріндегі ең қымбат мезеттің бірі екенін жеткізді. Жиын барысында Қытайдан келген қандасымыз, қолөнер шебері Ұлжан апай да сөз алып, өз әулетіндегі татулық пен келін тәрбиесіне қатысты көзқарасын білдірді. Әжесінен үйреніп, елінде көптеген шәкірт тәрбиелеген ол қазақ қолөнерінің қыры мен сырын әңгімелеп, арнайы алып келген көрпе, құрақ, тоқыма шәлі мен кесте бұйымдарын көрсетті.
— Қазір осы өңірде ұлттық киім-кешек пен тұрмыстық бұйымдар дайындайтын шағын шеберхана ашуды жоспарлап отырмын, — дейді.
Ұлжан апай келін болып түскен алғашқы жылдарын да еске алып, ата-енесіне деген құрметтің өз өміріндегі орны ерекше екенін атап өтті.
— «Не ексең, соны орасың» дейді үлкендер. Қазір өзім келіннің қолында отырған шақта осы сөздің шынайы мәнін терең түсінемін. Келінді қызыңдай көріп тәрбиелеу – берекелі отбасының бастауы, — деп сөзін қорытындылады.
Кездесу соңында сахнада «Асыл әжелер» ансамблінің көркемдік жетекшісі Ләззат Шушаева мен Раушан Рахметолақызы «Асыл әже», Сағира Кәрімжанова «Қазақтың келіндері» әндерін орындап, жұртшылықтың көңілін бір серпілтті. Жиын Амандық Батайдың жүрекке жылы «Ана туралы жыр» әнімен қорытындыланып, қатысушыларға әсерлі көңіл күй сыйлады.
Жалпы, танымдық кездесу отбасы құндылығының терең мәнін ашып, ене мен келін арасындағы сыйластықтың ұлттық тәрбиедегі орнына назар аудартқан тағлымды басқосу болды. Әрбір айтылған сөз, өмірлік мысал қазақ отбасына бағытталған асыл өнеге болып таралды.
Ділназ Серікбай
