24 қараша күні қаламыздағы «Maxi mall» сауда-сауық орталығында «Заң мен тәртіп» тұжырымдамасы аясында қоғамдық қауіпсіздік саласындағы ашықтықты арттыру және тұрғындардың өтініштеріне жедел жауап беру мақсатында бірыңғай қабылдау күні өтті. Бұл іс-шарада тұрғындар полиция қызметкерлерімен тікелей жүздесіп, көкейдегі сұрақтарын қоюға мүмкіндік алды.
Полиция басқармасының бастығы Төлеген Құдайбергеновтың айтуынша, мұндай форматтағы кездесулер халыққа қолайлы жағдай жасауға бағытталған тиімді қадам.
– Көп жағдайда азаматтар бөлімшеге келуге уақыт таба бермейді. Сондықтан біздің мамандар халықтың өз ортасына шығып, мәселелерін тыңдауды жөн көрді. Көшпелі қабылдаулар туындаған проблемаларды дер кезінде анықтап қана қоймай, олардың шешімін жедел табуға мүмкіндік береді. Тұрғындардың ұсыныстары мен шағымдарын тікелей тыңдау біздің жұмысымыздың маңызды бөлігі, – деді Төлеген Айдарханұлы.
Қабылдау барысында қоғамдық тәртіп, учаскелік инспекторлардың жұмысы, үйлердің аулаларындағы жағдай, жол қозғалысы және тұрмыстық құқықбұзушылықтар жөнінде сөз болды. Алайда келушілердің басым бөлігін алаңдатқан басты мәселе – алаяқтық қылмыстың күрт көбеюі болды. Интернеттегі қаржылық алаяқтық, жалған сауда платформалары, бейтаныс нөмірлер арқылы ақша талап ету секілді жағдайлар бойынша тұрғындарға құқықтық кеңес берілді. Мамандар әрбір азаматты жеке қабылдап, олардың сұрақтарына толық әрі түсінікті жауап ұсынды. Қабылдау барысында түскен кейбір өтініштер сол сәтте шешімін тапса, күрделі мәселелер бақылауға алынып, тиісті бөлімдерге жолданды. Сонымен қатар, полиция қызметкерлері Жастар бастамаларын дамыту орталығымен бірлесіп, алаяқтықтың алдын алуға қатысты түсіндіру жұмыстарын жүргізіп, ақпараттық жаднамалар таратты
Шараға қатысушылар мұндай форматтың қолайлылығын атап өтіп, полиция басшылығымен тікелей тілдесудің қоғам үшін аса маңызды екенін жеткізді. Полиция басқармасы тұрғындармен байланысты нығайту мақсатында алдағы уақытта да осындай қабылдауларды тұрақты түрде өткізуді жоспарлап отыр.
Ділназ Серікбай
