Жуырда «AMANAT» партиясының Екібастұз филиалында Павлодар облыстық мәслихатының төрағасы Илья Теренченко азаматтарды
жеке сұрақтарымен қабылдады. Кездесуде екібастұздықтар өздерін толғандырған мәселелерін ортаға салды.
Қала тұрғындары әр түрлі проблемаларды қозғады. Соның ішінде бірнеше тұрғын мәйітхананы жөндеу, оның ішінен ритуалды қызметтер залын ашуды ұсынса, тағы бір азаматтар қалалық ауруханаға іргелес аумақты абаттандыру жайын тілге тиек етті.
Көпқабатты тұрғын үйлердің ауласындағы көлік қозғалысын шектеу – көптен айтылып жүрген проблемалардың бірі. Облыстық мәслихат төрағасы Илья Теренченко осы мәселемен жүгінген тұрғындарға проблеманы құрылыс компаниясымен келісу немесе мақсатты қаражат жинау арқылы шешуді ұсынды.
Бірнеше зейнеткер Ресей Федерациясы бағытына да қатынайтын теміржол көлігі қозғалысын қайта қалпына келтіру мәселесін көтерді. Ардагерлердің тағы бір қозғаған мәселесі, қаңғыбас ит-мысыққа арнаған панажай ашу. Сондай-ақ, олар «Еңбек ардагері» медалімен марапаттау тәртібін де талқыға салды.
Кездесу барысында екібастұздықтардың барлық сұрақтарына түсініктемелер берілді, келіп түскен басқа да өтініштер бақылауға алынды.
Кенже ҚУАТ
