25 қараша күні Екібастұз қалалық мәслихатының құрылыс, көлік және тұрғын үй-коммуналдық шаруашылық мәселелері жөніндегі тұрақты комиссиясының отырысы өтті. Отырыс жұмысына қалалық мәслихаттың төрағасы Нияз Макраев, мәслихат депутаттары, тұрғын үй инспекциясы мен ТҮКШ, ЖК және АЖ бөлімдерінің басшылары, сондай-ақ, коммуналдық кәсіпорындар – «Energy Solution Center» ЖШС (Екібастұз ЖЭО), «Екібастұз жылу желілері» ЖШС, «Горводоканал» КМК және «Горэлектросеть» ЖШС өкілдері қатысты.
Күн тәртібінде биылғы жылыту маусымының өту барысы мен инженерлік инфрақұрылымның ағымдағы жағдайы қаралды. Коммуналдық кәсіпорындар басшылары атқарылған жұмыстар бойынша есеп беріп, жылу, су және электрмен жабдықтау жүйелерінің жай-күйіне тоқталды. «Energy Solution Center» ЖШС мәліметінше, ЖЭО-да биыл бірқатар маңызды жөндеу жұмыстары аяқталды. Атап айтқанда, 10-қазан агрегаты мен бір турбогенератор толық жөндеуден өтті. Қазіргі уақытта станса температуралық кестеге сәйкес жұмыс істеп тұр: 4 қазандық іске қосылған, ал тағы алтауы резервте тұр. Бюджет қаражаты есебінен жалпы қашықтығы 5 шақырымнан асатын №2 және №7 жылу магистральдары реконструкцияланып, гидравликалық сынақтар жүргізілгені айтылды.
Биыл қалада жылу желілерін жаңғырту жұмыстары кең көлемде атқарылды. 13 шақырымнан астам аулаішілік жылу құбырлары ауыстырылды. «Екібастұз жылу желілері» ЖШС жеті учаскеде күрделі жөндеу жүргізген. Жалпы алғанда, биыл 23 шақырымнан астам жылу желісі жаңартылып отыр.
Комиссия отырысында қаладағы жылыту маусымының жалпы тынысы да бағамдалды. Құзырлы мекемелердің хабарлауынша, қазіргі таңда жылыту маусымы штаттық режимде өтуде. Коммуналдық қызметтер қажетті техникамен, құрал-жабдықтармен қамтамасыз етілген авариялық бригадалар құрған. Арнайы техниканың дайындығы, жанармай қоры тексеріліп, жылу, су және электрмен жабдықтау жүйелерінде орын алуы мүмкін ақауларды жедел жою үшін авариялық қор қалыптастырылған.
Отырыста депутаттар коммуналдық сала өкілдеріне өздерін толғандырған сұрақтарын қойып, саланың жұмысын жақсартуға қатысты ұсыныстарын білдірді.
Ділназ Серікбай
