Аппараттық кеңесте автомобиль жолдарын қыс ішінде күтіп ұстау мәселесі де қаралды. Бұл жөнінде қала әкімдігінің тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Абай Хәкімов хабарлама жасады.
Үстіміздегі жылы көше-жол желісінің жалпы қашықтығы 177,9 километр автомобиль жолдарын күтіп ұстауға 1 239 809 мың теңге қаржы бөлінген екен. Соның 361,9 миллион теңгесі жолдарды қыс ішінде күтіп ұстауға жұмсалады. Аталмыш жұмыстарды «Ардабиль ЛТД» ЖШС, «Екібастұзкоммунсервис» ЖШС және «Диас-Дар» ЖШС атқарады. Үш кәсіпорында 120 техника бар. Көктайғақта себуге 3300 тонна материал мен 77 тонна реагент әзірленген. Алғашқы қар жауғалы полигонға 2000 тоннадан астам қар шығарылыпты.
Аудандық маңызы бар жолдардың жалпы қашықтығы – 290,4 километр. Осы жолдарды қыс ішінде күтіп ұстауға 23,7 миллион теңге қарастырылған. Және бұл жұмыс бірнеше кәсіпорынға бөлінген. Олардың қатарында «Екібастұзкоммунсервис», «Тазалық», «Баракат ЭК» жауапкершілігі шектеулі серіктестіктері мен «Тұмарбеков» жеке кәсіпкерлігі бар. Сонымен қатар, ауылдық елді мекендердің кіреберіс жолдарының күтіміне жауапты мердігерлер де анықталыпты. Ақкөл ауылдық округі – «Табыс» шаруа қожалығы, Солнечный кенті – «Баракат ЭК» ЖШС, Екібастұз ауылдық округі және Шідерті кенті – «Абдрахманова» ЖК, Шиқылдақ ауылы – «Бейсенов» ЖК, Әлкей Марғұлан ауылы – «Табыс» ЖК, Бәйет ауылдық округі – «Азике» ЖШС, Төртқұдық ауылдық округі «Бейсенов» ЖК, Қоянды ауылдық округі – «Рустем» ЖК, Сарықамыс ауылдық округі мен Теміржол ауылдық округі – «Абдархманова» ЖК және «Айтстрой» ЖШС.
Жалпы, жолдардың жай-күйіне ТҮКШ бөлімінің мамандары мониторинг жүргізіп, бақылауда ұстайтын болады. Осы бөлім 2026 жылға да конкурс жариялап, мердігерлерді анықтауға кірісіп кетіпті.
– Қала мен өңір жолдарын күтіп ұстауға қажетті қаржы бөлінді. Мердігерлер әлеуеті жеткілікті деп есептеймін. Қар қалың түсіп, төтенше жағдай қалыптасса, сырттан техника жұмылдыру үшін шарттар жасалған. Алдағы жылы жолдарды күтіп ұстауға жарияланған конкурс заң аясында ашық өткізілетініне сенімдімін, – деп қорытындылады қаралған мәселені қала әкімі Аян Бейсекин.
Бір ғажабы, аппараттық кеңеске қатысқан мердігер ұйымдар өкілдері тарапынан еш сұрақ қойылмады. Соған қарағанда олар өздеріне жүктелген шаруаны атқарып шығуға сақадай сай сияқты.
Ж.Жәлелұлы
