25 қараша күні қала басшысы Аян Бейсекин аппараттық кеңес өткізіп, экономика және қаржы бөлімі басшысының міндетін атқарушы Мая Сатвалдинова әлеуметтік-экономикалық даму және бюджеттің атқарылу қорытындылары туралы баяндама жасады.
2025 жылдың қаңтар-қазан айларында негізгі макроэкономикалық көрсеткіштердің басым бөлігі тұрақты өсім көрсетіп отыр екен. Инвестицияларды тарту өткен жыл деңгейінің 168,8 пайызын құрапты. Атап айтқанда, 10 ай ішінде биылғы жылға жоспарланған 371 миллиард теңге инвестицияның 365,4 миллиард теңгесі тартылыпты. Қалған бөлігі, яғни 5,6 миллиард теңге, оған қоса кемінде тағы 30 миллиард теңге инвестиция қараша-желтоқсан айларында құйылады деп күтілуде.
Құрылыс-монтаждау жұмыстарының көлемі 7,6 пайызға өсіп, 83,4 миллиард теңге мөлшерінде орындалыпты. Бұл жоспардың үштен екі бөлігінен асып тұр. Енді қараша айында 9 миллиард теңгенің, желтоқсан айында 31 миллиард теңгенің құрылыс монтаждау жұмыстары атқарылады.
Тұрғын үй құрылысы да қарқынды, есепті мерзім ішінде пайдалануға жалпы ауданы 64 мың шаршы метр тұрғынжай беріліпті. Жыл соңына дейін тағы 36 мың шаршы метр баспана салынады. Осылайша, жоспар 101,2 пайызға орындалады деген болжам бар.
Биылғы жылдың 10 айы ішінде ауыл шаруашылығында жалпы өнім көлемі 28,1 миллиард теңгеге жетіп, НКИ көрсеткіші 109,2 пайызды құрапты.
Енді сауда саласы жайлы айтар болсақ, бөлшек сауда көлемі 120 миллиард теңгені құрап, көтерме сауда көлемі 179 миллиард теңгеден асты. Жалпы, макроэкономикалық көрсеткіштердің жыл аяғына дейін орындалуына тәуекелдік жоқ.
Баяндамашының сөзіне қарағанда, өнеркәсіп өндірісінің көлемі – 1,2 триллион теңге.
1 қарашадағы жағдай бойынша нақты көлем индексі мынадай: энергиямен жабдықтау – 103 пайыз, өңдеу өнеркәсібі – 107 пайыз, тау-кен өнеркәсібі 96,4 пайыз. Ал жекелей салаларға тоқталсақ, көмір өндіру көлемі 5 пайызға өскенімен, Бозшакөл комбинатында мыс концентратын өндіру көлемі 38,8 мың тоннаға кеміп кетіпті.
Сөзінің соңында Мая Сатвалдинова бюджеттің кіріс және шығыс бөліктерінің орындалуы, тиісінше, 100 және 99,6 пайызды құрап отырғанын айтып өтті.
Баяндама аяқталған соң қала басшысы құрылыс, ауыл шаруашылығы және өнеркәсіпте қалыптасқан хал-ахуалды пысықтай келе:
– Екібастұз қаласының әлеуметтік-экономикалық дамуындағы көрсеткіштердің толық орындалуы облыстың көрсеткіштеріне тікелей әсер етеді. Сондықтан негізгі макроэкономикалық көрсеткіштер орындалуы тиіс. Сонымен бірге, бюджеттік бағдарламалар әкімгерлері бюджет қаржысының түгелдей игерілуін қамтамасыз етуге міндетті, – деп жауапты тұлғаларға тапсырмалар берді.
Айтпақшы, әр аппараттық кеңес сайын қала әкімі Аян Бейсекин баяндамаларды мемлекеттік тілде жасауды талап етіп жүр. Бұл жолы да солай болып, баяндамасын қазақ-орыс тілдерінде әзірлеп келген Мая Сатвалдиноваға ескерту жасады. Алдағы уақытта бұл өзге шенеуніктерге сабақ болар деген ойдамыз.
Ж.Жәлелұлы
