Екібастұз өңірінде ауыл шаруашылығы саласы қарқынды дамып келеді. Жалпы егістік алқабы 25 мың гектардан асады, оның ішінде 8 411,5 гектар жерге дәнді дақылдар, 10 925 гектарға – жем-шөптік дақылдар, 3 541 гектарға – картоп, 565 гектарға – көкөніс, ал 4 гектарға бақша дақылдары егілген.
Қыстаққа дайындық және мал азығымен қамтамасыз ету барысы туралы баяндаған ауыл шаруашылығы бөлімі басшысының міндетін атқарушы Азамат Көпежанов соңғы жылдары өңірде егіс көлемін кеңейту және жаңа технологияларды енгізу жұмыстары тұрақты жүргізіліп жатқанын айтты. Соның нәтижесінде суармалы жерлер көлемі 4,5 мың гектарға артқан.
Осыған орай, өнім жинау көрсеткіштері де жақсарды. Биыл өңірде 23,1 мың гектар алқаптан ауыл шаруашылығы дақылдары жиналды. Былтырғымен салыстырғанда негізгі өнімдердің өсімі байқалады. Айталық, картоп өндірісі – 25 пайызға өсіп, 85 мың тоннаға жеткен. Көкөніс өндірісі – 128 пайызға артқан, бұл 25,5 мың тонна өнім деген сөз.
Жылыжай шаруашылығында да оң өзгерістер бар. Биыл қияр – 5,5 мың тонна, қызанақ – 4,8 мың тонна көлемінде өндірілген.
Өңірде көкөністі сақтау инфрақұрылымы да жақсарып келеді. «Корн Агро» ЖШС (22,3 мың тонна) және «ЭМПК» ЖШС (0,9 мың тонна) иелігіндегі желдеткішпен жабдықталған көкөніс қоймаларының жалпы сыйымдылығы – 23,2 мың тонна. Бұдан басқа «Көктөбе ШҚ» ЖШС қуаттылығы 2,7 мың тонна болатын жаңа қойма құрылысын жүргізіп жатыр.
– Мал азығын дайындау үшін биыл 178,3 мың гектар шабындық алқап пайдаланылды. Жем-шөп дайындау науқанына 290 трактор, 263 шөп шабатын машина, 282 тырма, 168 тиегіш пен күделеуіш, 58 престеуіш техника жұмылдырылды, – дейді Азамат Көпежанов.
Биыл өңірде қыстаққа 54 042 ірі қара, 4 405 жылқы, 50 025 қой-ешкі кіреді екен.
Заман талабына сай шаруалар техника паркін жаңартуда. 2025 жылдың қараша айына дейін 645,3 млн теңгеге лизинг арқылы 66 ауыл шаруашылығы техникасы сатып алынған. Бұл өз кезегінде материалдық-техникалық базаны жаңартуға және өнімділікті арттыруға ықпал етіп отыр.
Гүлсана ҚУАТҚЫЗЫ
