Биылғы жыл – Екібастұз үшін жемісті жыл болып тұр. Өнеркәсіптік өңірде өндірістік кәсіпорындар саны көбейді. Соның жарқын көрінісі ретінде 20 қараша күні іске қосылған «EkibastuzFerroAlloys» ферроқорытпа зауытын атауға болады. Жаңа зауыт шығаратын жоғары маркалы ферросилиции әлемнің 52 еліне жөнелтіледі.
Жаңа кәсіпорынның салтанатты ашылу рәсімінде Павлодар облысының әкімі Асайын Байханов сөз сөйлеп, жобаның стратегиялық маңызын ерекше атап өтіп, оның мемлекет басшысы айқындаған негізгі міндеттер – шикізат экспортына тәуелділікті азайтып, қайта өңдеу секторын жедел дамыту және өңірлік экономиканың жаңа драйверлерін қалыптастыру бағытында іске асырылғанын тілге тиек етті.
– Өткен айда біз Екібастұзда жұмыс істейтін үш ферроқорытпа зауытының біреуін іске қосқан едік. Ал бүгін «EkibastuzFerroAlloys» зауытының ашылуына куә болып отырмыз. Бұл – өңірімізде толыққанды металлургиялық кластер қалыптастыруға және облыстың индустриялық дамуының жаңа кезеңін бастауға жасалған тағы бір үлкен қадам. Бұл Қазақстанды ферроқорытпа өндірісі бойынша әлемдік көшбасшылар қатарына шығаруға мүмкіндік береді, – деді облыс басшысы Асайын Қуандықұлы.
Салтанатты рәсімде сонымен қатар «EkibastuzFerroAlloys» ЖШС-нің бас директоры Мадияр Данияров, республикалық тау-кен өндірісі және тау кен-металлургиялық кәсіпорындар қауымдастығының атқарушы директоры Николай Радостовец, Екібастұз қаласы ардагерлер кеңесінің төрағасы Самат Рамазанов та жылы лебіздерін білдіріп, жаңа зауыт еңбеккерлеріне табыс тіледі.
Енді зауыт қалай салынғаны, жаңа кәсіпорынның өндірістік қуаты жайлы айта кетелік. Жоба 2022 жылы қолға алынып, биылғы қарашада аяқталып отыр. Жоба құны – 200 миллион АҚШ доллары. Оның 156 миллион доллары «Қазақстанның даму банкі» АҚ-нан алынған, 44 миллион доллары жеке қаражат. Құрылыс кезінде 1500 адам жұмысқа қамтылса, бұдан былай кәсіпорында 800 адам еңбек ететін болады. Орташа еңбекақы 470 мың теңге мөлшерінде деп көрсетілген. Зауыт бір жылда 240 мың тонна жоғары маркалы ферросилиции өндіретін болады. Атылмыш өнім әлемде болат, шойын және алюминий қорытпаларын өндіру үшін қолданылады әрі жоғары сұранысқа ие. Зауытта әрқайсысының қуаттылығы 94,5 МВА болатын төрт инновациялық рудотермиялық электр пеші орнатылған. Кәсіпорын акционері Ерлан Нығматулиннің айтуынша, зауыт «жасыл металлургия» қағидаттарына негізделген және ең озық технологияларды қолданады: «Газды тарату 99,8 пайыз деңгейінде. Барлық шығатын газдар көпсатылы сүзгі жүйесінен өтеді, ал жиналған шаң құнды қосалқы өнім – микрокремнезем болып қайта өңделіп, әлемдік нарыққа экспортталады.
Салтанатты рәсімнен соң жиналған қауым ферросилицидің құйылу сәтін тамашалап, өндірістік процестің іске қосылғанының куәсі болды.
Ж.Сәдуақас
