Мемлекет тарапынан жас буынның денсаулығына баса назар аударылуда. Осы орайда №3 емхана базасында психологиялық, медициналық көмек көрсететін «Болашақ» жастар орталығы ашылған-ды. Бүгінде орталық қала бойынша ғана емес, ауылдық округ тұрғындарына да көмек көрсетеді. «Болашақтың» жұмысы туралы қалалық коммуникациялар қызметінде №3 емхананың психологы Сарбиназ Құнанбаева баяндады.
№3 емхана жанынан ашылған денсаулық орталығы 10-29 жас аралығындағы буынға қызмет көрсетеді. Мұнда 18 жасқа дейінгілер ата-аналарының рұқсатымен, 18-ден асқандар өздері келіп көмек ала алады.
– Жастардың денсаулығын жақсарту бағытында көптеген істер атқарылып жатыр. Осы мақсатта қаладағы мектептер мен колледждерде семинар-тренингтер өткізіп жүрміз. 18-ден асқандар орталық қызметін анонимді түрде пайдалана алады, – деді бұл туралы С.Құнанбаева.
Орталықта жасөспірімдерге психологиялық қолдау, гинеколог, уролог мамандардың көмегі, сонымен қатар, заңгер қызметі ұсынылады. Мамандардың жұмысы құпиялылықты сақтау мен сенімге негізделген. Аты-жөнін айтуды қаламағандар өз проблемаларын қорықпай талқылай алады.
– Қабылдауда байқағаным, ата-анасы ажырасқан балалар қатты күйзеліске түседі. Олар өздерін ешкім түсінбейтіндей, қала берді ата-анасы да естімейтіндей күй кешеді. Өкінішке қарай, психологиялық қолдау таппаған бала соңғы қадам – өлім туралы ойлай бастайды. Буллингке ұшыраған балалардың психоэмоционалдық күйі де осыған жақын, – дейді маман.
Гаджеттерді еркін қолданатын буынның басты проблемасы – онлайнтәуелділік. Бүгінде балалар кішкентайынан мобильді телефоннан керекті ақпаратты емес, көбіне интернет-ойындарды қарап, бос уақыттарын өткізеді. Психолог маманның айтуынша, интернет тәуелділіктің соңы медициналық емделуге алып келеді. Қазірдің өзінде балаларда бас ауруы, ашушаңдық, қол дірілдеуі (тремор) секілді неврологиялық ауытқулар жиі кездеседі. Сондықтан жасөспірім балалармен сөйлесіп, бойындағы өзгерістерді уақытында байқап отырған жөн.
Денсаулық орталығы кешенді түрде медициналық-психоәлеуметтік көмекті кешенді көрсету арқылы қоғамдағы лудомания, нашақорлық секілді проблемалардың алдын алуға қадам жасайды. Жыл басынан бері денсаулық орталығына 7721 адам көмек сұрай келіпті. Олардың басым көпшілігі – әйел адамдар. Білім мекемелерінде 3601 семинар-тренинг өткізіліпті. Ерте жүктіліктің 2 фактісі белгілі болып, суицидтік тәуекел тобындағы 6 жасөспірім анықталған. Психолог көмегіне 16-18 жас аралығындағылар жиі жүгінеді екен.
Гүлсана МЕДЕУБАЙТЕГІ
