Екібастұзда «Балақайлар мектебі» деп аталатын мектепалды даярлық топтары жұмысын бастайды. Бұл – бірінші сыныпқа келетін бүлдіршіндерді жан-жақты дамыту мақсатында ел көлемінде қолға алынған қысқа мерзімді бағдарлама. Ол негізінен мектепалды даярлықпен қамтылмаған балаларды оқуға дайындау үшін әзірленген.
Былтырдан бері қолға алынған жоба негізінде балаларға 10 минуттық үзілісі бар 30 минуттық сабақ өткізіледі. Бағдарлама 1 айға арналған. Мұнда баланың коммуникативті дағдыларын, танымдық және зияткерлік, әлеуметтік-эмоционалды машықтарын қалыптастыру көзделген. Олар мектеп тәртібімен танысады. Үзіліс кезінде бүлдіршіндер түрлі ойындар ойнайды. Қолдың ұсақ моторикасын, қимылдарды үйлестіруді дамытуға арналған жаттығулар жасайды. Бір-бірімен араласып, жаңа достар табады. Балақайлар топтық жұмыс істеп үйренеді. Мұның бәрі баланы ортаға бейімдеу, бастауышқа дайындау үшін жасалады.
Биыл «Балақайлар мектебіне» 6-7 жас аралығындағы 2000-нан астам бала қатысады. Олардың 1148-і мемлекеттік тілде оқытылады.
