Биыл Екібастұзда Наурыз мейрамының дүбірлеп өтуіне қаладағы мекемелер мен кәсіпорындардың Наурызнама онкүндігіне белсенді қатысуы себеп болды. Мерекенің тағлымды болуына, әсіресе, Лаура Дисюпова басқаратын Екібастұз қаласының білім бөлімі, Фарзия Клепица басқаратын «Қайнар» ББК және мектептер мен балабақшалар ұжымдары ерекше үлес қосты.
Білім ауылы әзірлеген қызғалдақ гүлдерді газетіміздің өткен санындағы репортажымызда тілге тиек еткен болатынбыз. Бұл — көктемнің, өркендеудің және Ұлы Даланың жеті қырының бір нышаны әрі «Наурыз-шешек» акциясының түйіні. Білім ауылындағы тағы бір көңіл аударарлық жайт — «Қонақжай қазақ» мерекелік композициясы, яғни, қыздардың меймандарды наурыз дәмі — ыстық бауырсақпен қарсы алуы.
Киіз үйлерді аралап шыққан қонақтар «Хан тағы» фотоаймағында естелік суретке түсті, оның екі жағына батырлардың қалқандары орналастырылыпты. Қазақ ертегілерінің кейіпкерлері — Бауырсақ, Алтын сақа, Қошқар мен Теке, Мерген мен Алдаркөсені осы жерден табасыз.
Қақпадан киіз үйлерге дейін төселген жасанды шөп үстімен жүрсеңіз, ұлттық ою-өрнекпен әсемделген үш этноаркамен өтесіз. Олардың арасында балалар көркемсурет мектебінің этнографиялық инсталляцияларымен әрленген ақ түсті сандықтар тұр: қазақ халқының бай мәдени мұрасының көрінісі.
Білім ауылын үш киіз үй құрады:
Бірінші киіз үй ғалым, зерттеуші және қоғам қайраткері Шәмшиябану Сәтбаеваға арналды. Бұл киіз үйде Шәмшиябану апаның көзін көрген Райхан Қоғабаева естелік шертті.
Екінші киіз үй қазақтың ақыны Қадыр Мырза Әліге арналды. Мұнда ақын өлеңі оқылып, күллі ел жатқа білетін «Қазақ осы» әні домбырада орындалды.
Үшінші киіз үй Қазақстан халқы ассамблеясының 30 жылдығы мен Қазақстан Республикасы Конституциясының 30 жылдығына арналды. Әр киіз үйдің жанында тақырыбына сәйкес QR-коды бар ақпараттық тақтайша орнатылып, іште интерактивті тач-панельдер арқылы қызықты таныстырылымдар өткізілді. Бір сөзбен айтқанда, ұлттық рух пен дәстүрді тоғыстырған Білім ауылы келушілерге жарқын көңіл күй сыйлап, Наурыздың сән-салтанатын шынайы сезіндіре білді.
Ж. ЖАПАРОВА
