Қазақ халқы қыз атаулығы ерекше талаппен қараған. «Қызды төрге отырғызып, төреңдей күт» деген ұстаныммен қыздарын бақыт құсына теңеп, ерекше аялап, әлпештеп өсірген. Қызды сұлулықтың символы ретінде көріп, оның мінезіне, қылығына, тіпті киім-кешегіне ерекше мән берген. Әрбір ана сәбилі болғанда оқалы тақиясын дайындап, өсе келе құндыз бөрікке ауыстырған. Қыз ұзатылғанда сәукелесін сәндеп, ал келін атанғанда кимешегін, жаулығын ораған.
Ақ матадан тігілген, әйел затына көрік беріп, ажарын ашқан киелі кимешек — баршамызға таныс дүние. Ертеде қазақ әйелі үй шаруасында, той-думан жиынында кимешегін басынан шешпеген. Бұл — қазақ әйелдерінің сәндік бұйымы ғана емес, даналығы мен сұлулығының бір бөлшегі әрі ұлттық құндылықтардың символы. Кимешек — әйелдің қоғамдағы жоғары дәрежесі мен биіктігінің көрсеткіші.
Наурызнама онкүндігі аясында Екібастұз тарихи-өлкетану музейінде «Ақ кимешек көрінсе…» атты шара өтіп, оған «Ана ұлағаты» қоғамдық бірлестігі, «Қамажай» этнофольклорлық ансамблі, Инновациялық Еуразия университеті жоғары колледжінің студенттері және №25 қыздар гимназиясының оқушылары қатысты. Кездесу кешінің сәнін Art Production Ekibastuz өнер мектебінің тәрбиеленушілері «Нәр ағаш», «Домбыра» күйлерімен келтірді.
Шара барысында көрме ұйымдастырылып, музей қорынан түрлі кимешектер назарға ұсынылды. Көрмеде ХІХ ғасырда қолданылып, жәдігерге айналған асыл киіммен бірге қазіргі қолданыстағы кестелі, оюлы кимешектерге дейін шеру құрды. Ақ жаулықты әжелеріміз кездесуде кимешектің пішіні мен тігісінің мәнін, тарихтағы қоғамдық-саяси сипатын, кимешекке қатысты салт-дәстүрлерді түсіндірді.
Жаулық пен ақ шаршы орамал шылауышты сәнді етіп тағудан шеберлік сабағы өтті. Шара барысында музей қоры құнды жәдігермен толықты. Атап айтсақ, «Қамажай» этнофольклорлық ансамблінің жетекшісі Гауһар Кәрімова музейге сахналық, ұлттық нақыштағы кимешек, күндік, көйлек, кеудеше киім үлгісін сыйға тартты.
Т. Бейсембаева, Екібастұз тарихи-өлкетану музейінің маманы
