— Өкінбеймін, күн зулап өте берсін,
Кейінгілер, жүрегім, мені көрсін.
Жырым мені ешқашан өлтірмейді,
Әнім, мені алысқа жетелерсің, — деп ақын Тұманбай Молдағалиев «Қайран, менің жүрегім» өлеңінде жыры мен әнінің өзі өмірден өткен соң да халықтың жадында мәңгі қалатынын айтып кетіпті. Ал жыры мен әні ұмытылмаса, ақынның да есімі ұмытылмайды.
31 наурыз күні «Атамұра» мәдениет орталығында Қазақстанның халық жазушысы, Мемлекеттік сыйлық-тың лауреаты, ақын Тұманбай Молдағалиевтің шығармашылығына арналған кеш өткізілді. Ол 1935 жылы 20 наурызда Алматы облысы Еңбекші-қазақ ауданы Жарсу ауылында өмірге келген. Яғни, биыл туғанына 90 жыл болды.
Лирик Тұманбай ақын қазақ поэзиясына 1957 жылы баспадан шыққан тұңғыш өлеңдер жинағы — «Студент дәптері» кітабымен тың леп ала келді. Осыдан соң көптеген жыр жинақтары жарық көрген ақын «Жүректегі жазбалар» кітабы үшін мемлекеттік сыйлық алды. Ол ұзақ жылдар «Балдырған» журналының бас редакторы қызметінде болып, жемісті еңбек етті.
«Атамұра» мәдениет орталығындағы концерттің ара-арасында Тұманбай ақынның шығармашылығы жайлы деректі фильмнен үзінділер көрсетіліп, жиналған қауым ақынның өз даусын естіп, жары Күлтай Қасымованың естелігін тыңдады.
Айтпақшы, сонау 2011 жылы 7 қазанда Тұманбай ақын Екібастұз қаласына келуді жоспарлаған болатын. Амал нешік, сапарға шығар алдында ақын ауыр сырқаттанып, көз жұмады. Сөйтіп, «Атамұра» мәдениет үйінің директоры Нұрсұлу Төлеубаева мен қаламгер Рауза Мұсабаева бірлесіп ұйымдастырған ақынның шығармашылық кеші өтпей қалады.
— Тұманбай ақынның өлеңдеріне жазылған әндер ел ішінде кеңінен таралған. Ол әйгілі сазгерлер: Әсет Бейсеуов, Шәмші Қалдаяқов, Нұрғиса Тілендиевпен бірлесіп шығармашылық жұмыс істеген. Тұманбай ақын мен композитор Нұрғиса Тілендиевтің «Құстар қайтып барады» әнін айтпаған қазақ кемде-кем болар. Бір жолы екеуі кездескенде Нұрғиса: «Тұманбай, енді құстарды Алматыға кері қайтармаймыз ба?» — деп ой айтып, содан «Келе жатыр құс қайтып» әні туған, — деп әңгіме тиегін ағытқан Рауза Молдайыпқызы ақынның «Әйелдер» өлеңін жатқа оқып берді.
«Атамұра» мәдениет орталығының директоры Нұрсұлу Еркебайқызының естелігі де татымды шықты.
— Екібастұз қаласында шығармашылық кешін өткізу туралы уәделескен соң, Тұманбай ақын «Арман адастырмайды» кітабын пойыз арқылы беріп жіберді. 100 дана кітап лезде сатылып кетті. Сөйтіп, ақынның өзін күтіп жүргенде қаралы хабар жетті. Сол кездегі қала әкімінің орынбасары Нұрлан Күлжанмен кеңесіп, Алматыға сапар шегіп, Тұманбай ақынның үйінде болып, бата жасап, кітаптың қаражатын ақынның жары Күлтай апаның қолына табыстадым. Сол жолы мені теміржол вокзалынан ақынның жүргізушісі Сарқыт деген азамат күтіп алды. Ол ашық-жарқын адам екен. Жол бойы Тұманбай ақынның мінезі, кісілігі жайлы әңгіме айтты. «Қызметіне бара жатқанда жол үстінде бала көтерген әйелді көрсе, көлікті тоқтатып, баратын жеріне жеткізіп тастаушы едік. Менің отбасыма да көп көмегі тиді. Алматыға Семей жақтан көшіп келіп, бала-шағаммен пәтер жалдап тұрушы едім. Соны білген соң қала сыртындағы саяжай үйін паналауыма кеңшілік жасап, кейін пәтер алуыма септігін тигізді» деген Сарқыт жүргізуші ақынның азаматтығын, адамгершілігін сүйсіне айтты. Алматыдан кері қайтарда Күлтай апа ақынның «Құстар, құстар» кітабын қолтаңба жазып сыйлады. Сол кітап үйімде құнды жәдігер ретінде сақтаулы тұр, — деді Нұрсұлу Төлеубаева.
Концертте Марат Ахаев «Жан ана», Арман Рай «Қайран менің жүрегім», Тайжгүл Купай «Бақыт құшағында», Күмісхан Сағындық «Келе жатыр құс қайтып», Ертіс Ахаев «Ауылымды сағындым», Гүлнәр Асанова «Туған жер», Жанболат Илеубаев «Махаббат мұңы», Гүлмайра Тілеубаева «Куә бол», Гүлмира Алданова «Құстар қайтып барады» әндерін шырқап, көрермен қауым караокеге қосылып «Құрбым, жан құрбым, бала кезімнен, Бақыт көруші ем қара көзіңнен…» деп ән айтып, кешті ұйымдастырушыларға ризашылық білдіріп тарқасты.
Ж. Жәлелұлы
