Облыстық, қалалық мәслихаттардың ҮІІІ шақырылымы депутаттарының жұмыс істеп жатқанына 27 наурызда екі жыл толды. Осы күнге орай былтырдан белгіленген дәстүрге сай Павлодар облыстық мәслихаты төрағасы Илья Теренченко аймақты аралап, жер-жердегі мәслихаттар өкілдерімен жүздесу өткізеді. Биыл да сол дәстүрден айнымады. Өткен апта соңында Екібастұзға ат басын тіреген ол алдымен «AMANAT» партиясында қоғамдық қабылдау өткізіп, кейін қалалық мәслихат депутаттарымен кездесті.
Қалалық мәслихат комиссияларының төрағалары Илья Теренченкоға өңір жұртшылығын мазалап жүрген ең маңызды мәселелерді жайып салды. Олардың дені денсаулық сақтау саласына қатысты. Ел ішінде көп талқыланып, «сіңірі шыққан» проблемалардың басында кадр тапшылығы тұр. Қала емханалары мен орталық аурухана бүгінде дәрігерге аса зәру. Оқуын тәмамдап, Гиппократ антын қабылдап, кенді қалаға келген жас мамандарымыз тұрақтай алмай жатқан жайы бар. Оған бірден-бір себеп жас маманға бөлінетін көтермеақы көлемінің мардымсыздығы екен.
— Қарап отырсақ, жастарымыз ірі қалаларда, облыс орталықтарында тұрақтауға бейілді. Ал олардың шағын шаһарымызға келіп, осында орнығуы үшін біз не ұсына аламыз? Павлодар қаласында жас дәрігерге 8 миллион теңге бөлінетін көрінеді. Ал Екібастұз беретін көтермеақы 3 миллион теңгеден аспайды екен. Асылында, біздегі көтермеақыны да сол мөлшерге жеткізу қажет, — деген ұсыныс тастады халық қалаулылары.
Біршамадан бері талқыланып жүрген тағы бір өзекті мәселе — қалалық перзентхананы орталық аурухана ғимаратына көшіру. Мұны жақтағандар: «Бюджет қаражаты үнемделіп, коммуналдық және басқа да шығындар едәуір азаяр еді», — десе, талай жылдардан бері орнығып, қалыптасқан перзентхананы жылы орнынан қозғауға қарсы тарап та табылды. Соңғылардың пікіріне депутаттар да жақтас.
— Қалалық перзентхана былтыр ғана күрделі жөндеуден өтті. Аталмыш медициналық мекеме бүгінде Екібастұз өңіріне ғана емес, сондай-ақ, Баянауыл ауданына да қызмет көрсетеді. Перзентхананың тиісті құрал-жабдықтармен жабдықталуы 85 пайызды құрайды. Оны өз ғимаратында қалдырған жөн, сайлаушыларымыздың да қалауы осы, — деп, депутат Мәриям Маликова көпшілік пікірін жеткізді. И.С.Теренченко бұл жайлы облыс және Екібастұз қаласының басшылығы құлағдар екенін әрі жергілікті әріптестерімен пікірлестігін білдірді.
Қалалық мәслихат депутаты, «AMANAT» партиясы Екібастұз қалалық филиалының басшысы Мәриям Маликова партияның «Жол картасы» аясында атқарылып жатқан шараларын тілге тиек етіп, түйткілді тағы екі мәселеге тоқталды. Атап айтсақ, Марғұлан мен Бәйет ауылдарындағы әлі күнге аяқталмай жатқан медициналық пункт құрылысының жайы мен қаламыздағы төтенше жағдайлар бөлімшелеріне және өртке қарсы, сондай-ақ, құтқару қызметтеріне қарасты ғимараттардың күрделі жөнделуі. Медициналық пункттер құрылысының ұзаққа созылуына жауапты облыстық басқарманың басшылары жазаланған екен. Ендігі кезек құрылысты аяқтауға қажет қаражаттың бөлінуі көрінеді. Мәриям Дәулетбекқызы бұл шаруа жақын арада шешілетінін хабарласа, төтенше жағдайлар қызметтерінің ғимараттарын жөндеу мәселесінің оң қаралатынына күдігі барын жасырмады. Біріншіден, ғимараттар республика меншігінде болғандықтан жергілікті билік оған араласа алмайды. Екіншіден, осы күнге дейін қаражат бөлінбеуі салдарынан ғимараттарды жөндеуге сметалық жобалар да жасалмаған көрінеді. Осы кезде Илья Теренченко жақында ғана Мәжілістегі павлодарлық депутаттар профильдік министрлікке проблеманы жеткізгенін айтып, алдағы уақытта оң нәтиже болатынына сендірді.
Екібастұздық депутаттар көптен көтеріп жүрген мәселенің бірі — жергілікті бюджет есебінен жөндеуден өтіп, тиісті техникамен жабдықталған ветеринарлық лабораторияға маман-дар даярлау.
— Қазір қай саланы алсақ та, бәрінде кадрлар тапшылығы өзекті. Жас мамандар тарту қолдан келмеген соң, зейнет жасындағы қызметкерлер жұмыс істеп жүр. Қаладағы емханалар мен аурухананы мысалға алайық. Бұл да проблеманы шешудің бір жолы екені рас. Ал ауыл шаруашылығы саласында бәрі басқаша. Мұнда, естуімізше, өз ішіндегі ережелерге сәйкес зертханаға зейнеткерлерді жұмысқа алуға тыйым салынған. Неліктен екенін білмей далмыз, — деген депутат Жанат Ибраевтың сауалын облыстық мәслихат төрағасы анықтайтынын айтты.
Мал қорымы жайлы да мәселе сөз болды. Жанат Хамитұлының айтуынша, былтыр өңірдегі үш елді мекенде мал қорымы нысаны қалыпқа келтірілген. Қаланың өз аумағында мал өлексесін жинайтын қорым әбден толы. Консервацияланған. Содан соң мал өлексесінен арылу мақсатында ГРЭС аумағына жақын орналасқан шаруа қожалықтарының біріне инсинератор (өлексені өртейтін құрылғы) қойылыпты. Депутат оның экология талаптарына сай келмейтінін айтып, осы мәселені шешуге атсалысуды сұрады.
— Қазір облыстық ауыл шаруашылығы басқармасы бір мал қорымын құрылысына 49 миллион теңге қаражат сұрап отыр. Облыс басшылығы да, әріптестеріміз де бұл соманы тым артық деп білеміз. Алыс-жақын шетелдерде бұл шаруа тіптен басқаша шешіледі екен. Тіпті өлексені өртеген күннің өзінде одан энергия алуды жолға қойғандары бар деседі. Облыс басшысы осы мәселені де қарастыруды тапсырды. Айта кету керек, облыстағы «Ауыл» партиясының филиалы басшысы Болат Аманжолов осы мәселеге білек сыбана кірісіп, алдағы сессияға дейін шешу жолдарын ұсынуы тиіс, — дей келе, Жанат Ибраевты аталмыш проблемаға қатысты мәселеде профильдік комиссияға сарапшылыққа шақырды. Халық қалаулысы одан қашпас, тек нәтижесі ел кәдесіне жараса игі…
Айтпақшы, 2019 жылдан бері жүзеге асырылып келе жатқан «Ауыл — ел бесігі» мемлекеттік бағдарламасы турасында да әңгіме өрбіді. Ауыл тұрғындарының өмір сүру сапасы мен әл-ауқатын жақсарту, ауылдарды тұрақты дамытуға арналған осы бағдарламада көрсетілген барлық игілік қаладан 50 шақырым жердегі ауылдарға ғана жасалады екен. Ал біздің өңірде қаламыздан алыс орналасқан ауылдар қаншама?! «Шалғайдағы ауылдар сонда қалай дамиды?» деген маңызды сауал туындайды. Депутаттар «Бағдарламаның осы ережесін өзгерту керек» десіп, ұсынысты Мәжіліске жолдайтын болды.
Бұдан соң қаладағы ірі кәсіпорындардың әлеуметтік жауапкершілігі, Жеңістің 80 жылдығы қарсаңында қаладағы тыл еңбеккерлеріне қолдау көрсету мәселелері де талқыланды. Өз тарапымыздан біз де Ақкөлге апарар жол жайын айттық. Былтырдан бері халық жөнделген жолдың игілігін көріп келеді. Билікке айтылып жатқан алғыстарды да естіп жүрміз. Алайда осы күні тақтайдай жолмен аса ауыр жүк артқан көліктер де зуылдап жатыр. Ақкөлдіктердің «ауыр жүк көліктері жолды құртады-ау» деген қорқынышын өкілетті билікке кезекті рет жеткізіп, назар аударуларын сұрадық. Осы орайда депутат Жетпісбай Жакупов аталмыш мәселенің бірден-бір шешімі жолға облыстық мәртебе беру деген ұсынысын айтты. Ұсыныс қабылданса, құба құп.
Айнұр Қасымжан
