Жыл басынан бері өңірдегі инфекциялық және паразитарлық ауруларға қатысты эпидемиологиялық жағдай тұрақты. Алайда іш сүзегі, сіреспе, безгек, дифтерия, полиомиелит, қызамық, эпидемиялық паротит, көкжөтел, қызылша, А және В вирустық гепатиттері, вирустық менингит және коронавирус инфекциясы тіркелген. Бұл туралы қалалық коммуникациялар қызметінде өткен брифингте Екібастұз қалалық санитарлық-эпидемиологиялық бақылау басқармасының бөлім басшысы Бақыт Бекпаева мәлімдеді.
— Көктемгі эпидемиялық маусымда тұмаудың 18 жағдайы анықталды, олардың 16-сы — ересектер, 2-еуі балалар арасында тіркелген. Өткен жылмен салыстырғанда, тұмау жұқтырғандар саны 2,5 есеге артқан (2024 жылы — 7 жағдай). Сонымен қатар, жедел респираторлық вирустық инфекциялардың (ЖРВИ) 45 666 жағдайы тіркелсе, оның 28 276-сы 14 жасқа дейінгі балалар арасында анықталды. Өткен жылы бұл көрсеткіш 87 318-ге жеткен болатын, яғни, аурушаңдық екі есе төмендеген, — дейді Бақыт Телеубайқызы.
Ал асқазан-ішек инфекцияларының деңгейі өткен жылмен салыстырғанда өзгеріссіз қалғанымен, сальмонеллездің 2 жағдайы және балалар арасында 15 ротавирустық инфекция тіркелген. Ротавирустық инфекция — асқазан-ішек жолдарының ауруы, ол улану және сусыздану белгілерімен сипатталады, көбінесе 6 айдан 2 жасқа дейінгі балаларда кездеседі. Ауру ластанған тағам мен тұрмыстық байланыс арқылы жұғатындықтан, оны «лас қол ауруы» деп те атайды.
Көктемгі су тасқыны кезінде ауыз судың микробтармен және вирустармен ластану қаупі артады. Бұл жағдай қардың тез еруі, жауын-шашын және өзендердің тасуы салдарынан орын алуы мүмкін. Сондықтан мамандар тұрғындарға тек қайнатылған немесе бөтелкедегі суды тұтынуды, тағам өнімдерін дұрыс сақтауды, жануарлар мен жәндіктерден қорғауды, жеке гигиена талаптарын қатаң сақтауды, қолды жиі жууды және күмәнді тағамдарды пайдаланбауды ұсынады.
Ағымдағы жылдың алғашқы екі айында өңірде туберкулездің 4 жаңа жағдайы тіркеліп, науқастардың барлығы еңбекке жарамды жастағы адамдар (18-64 жас) болған. Туберкулез — адамнан адамға ауа арқылы таралатын қауіпті инфекция. Аурудың алғашқы белгілеріне ұзаққа созылған жөтел, әлсіздік, дене температурасының тұрақты көтерілуі, түнгі терлеу және тәбеттің төмендеуі жатады. Оны ерте анықтау үшін флюорографиялық тексеруден уақытылы өту маңызды. Туберкулездің алдын алу шараларына дұрыс тамақтану, дәрумендерге бай тағамдарды тұтыну, дене белсенділігін арттыру, таза ауада серуендеу, тазалық сақтау және БЦЖ екпесін алу жатады.
Қауіпті және карантиндік инфекциялар бойынша өңірде сібір жарасы, бруцеллез, құтырма сияқты аурулар тіркелмегенімен, қаңғыбас иттер мен басқа да жануарлардың тістеуі салдарынан құтыру қаупі сақталуда. Жыл басынан бері жануарлардың тістеуінен 54 адам медициналық көмекке жүгінген, оның ішінде 25 адамды бұралқы иттер қауіп алған. Құтыру — жүйке жүйесін зақымдайтын және өлімге әкелуі мүмкін аса қауіпті вирус. Егер адамды ит немесе басқа жануар тістесе, дереу медициналық мекемеге барып, антирабиялық вакцина алу қажет.
Жалпы, өңірдегі инфекциялық аурулардың көрсеткіші өткен жылмен салыстырғанда төмендегенімен, көктемгі су тасқыны кезеңінде вирустық инфекциялардың таралу қаупі әлі де бар. Осыған байланысты мамандар тұрғындарды санитарлық-гигиеналық нормаларды қатаң сақтауға және алдын алу шараларын ұмытпауға шақырады.
Ділназ Серікбай
