Наурыз мейрамы қарсаңында қаламыздың тарихи-өлкетану музейінде «Ұлттық әдет-ғұрып, салт-дәстүрге үйрету» атты рухани-танымдық тренинг өтті.
Шараға ұлттық мәдениетті насихаттаушы, «Кәусар» вокалдық тобының жетекшісі Қазына Алпысбаева, топ мүшесі Нәсіп Малыбаева және қолөнер шебері Баян Құсдәулетова қатысты. Қазына Алпысбаева қазақ халқының бала тәрбиесіне қатысты ғұрыптары туралы кеңінен баяндап, нәрестеге ат қою рәсімінің ерекшеліктерін түсіндірді.
— Қазақ халқы баланың дүниеге келуін үлкен қуаныш санаған. Шілдехана тойынан бастап, қырқынан шығару, қалжа жегізу, тұсау кесу секілді дәстүрлеріміз терең мағынаға ие. Әсіресе, есім қоюда үлкендер баланың болашағына игі ықпалын тигізеді деп сенген, — дейді Қазына Қылышбайқызы.
Тренингте халқымыздың мәдени мұрасын дәріптейтін дәстүрлер көрсетілді. Атап айтқанда, балаға ат қою, бұрымын өріп, шашбау тағу, сәукеле кигізу сынды әдет-ғұрыптар сахналанды. Сонымен қатар, ұмыт бола бастаған ұлттық тағамдардан дастархан жайылып, көрме ұйымдастырылды. Онда үлпершек, әсіп, жаужүрек, өрме төстік секілді ас түрлері ұсынылды.
Қазақ қыздары үшін бұрым тек сән ғана емес, олардың көркі мен абыройының айнасы саналады. Ұзын әрі әдемі өрілген шаш қыздың тәрбиелі, инабатты екенін көрсеткен. Сол себепті халқымыз бұрымды ерекше қадірлеп, оны күтіп өсіруді дәстүрге айналдырған. Тіпті, сенім бойынша, бұрымды кесу қыз баланы күшінен айырумен тең болған.
Шарада шаш сәндеу дәстүрі айрықша көрініс тауып, ұлттық нақыштағы әшекейлі бас киімдермен үйлесім тапты. Қазақ қыздарының шолпы, шашбау тағу дәстүрі де назардан тыс қалмады. Шашбау — тек шаштың көркін арттыратын әшекей емес, оның тәрбиелік мәні де ерекше. Ол қыз баланың шашын күтіп ұстауына ықпал етіп, жүріс-тұрысының жинақы болуын реттеген.
— Шашбау мен шолпының ерекшелігі — олардың салмағында. Ол қыз жүрісінің ширақтығын сақтап, сымбатын тік ұстауға үйреткен. Сондай-ақ, әсем сыңғыры қыздың жүрісіне нәзіктік пен үйлесім берген, — дейді Баян Құсдәулетова.
Ділназ Серікбай
Суреттерді түсірген: В.Фадеев
