Ұлыстың ұлы күні қарсаңында мәдениет, тілдерді дамыту, дене шынықтыру және спорт бөлімінің қолдауымен, «Атамұра» мәдениет орталығының ұйымдастыруымен «Ұлттық киім — ұлт мақтанышы» фестивалі өтті. Бұл шара қазақтың ұлттық киімдерін дәріптеп, олардың тарихы мен мән-маңызын жас ұрпаққа таныстыруды мақсат етті.
Фестивальға әр түрлі жастағы, түрлі салада еңбек ететін азаматтар қатысты. Қатысушылар өздерінің ұлттық киім үлгілерін таныстырып, қазақ мәдениетінің байлығын паш етті.
Бірінші болып сахнаға шыққан Лаура Ерботина ұсынған киім үлгісі қазақтың көшпелі кезеңінен бүгінге дейін жеткен қолөнердің үздік үлгісі екенін көрсетті. Әсемдігімен әрі ыңғайлылығымен ерекшеленген бұл киім көрермендердің ерекше ықыласына бөленді.
«Богатырь Көмір» ЖШС жылу және сумен жабдықтау аппаратшысы Карина Рафиковна сахнаға шыққан сәтте оның ұлттық нақыштағы киімі халқымыздың тарихын айшықтай түсті. Қазақтың ұлттық киімдері – табиғатпен үндесе жасалған, еркіндікті білдіретін өнер туындысы.
№22 гимназия-мектебінің хатшысы Азира Қожахметова қазақтың дәстүрлі барқыт тақиясын киіп шықты. Бұл бас киім тіл-көзден сақтасын деген ниетпен үкінің үлпек қауырсынымен безендірілген. Сонымен қатар, күміс кестелер мен қазақы оюлар тақияға ерекше көрік берді.
Қазақ халқының ержүрек қыздарының рухына тағзым ретінде он төртінші нөмірлі Диана Төлеубаева батыр әйелдің бейнесінде сахнаға шықты. Түлкі тымақ, түлкі терісінен жасалған шапан, қалқан мен қылыш ұстаған ол нағыз жауынгер бейнесін көрсетті.
Фестиваль барысында қазақ әйелдерінің бас киімдеріне ерекше мән берілді. Қатысушылар көрермендерге «Гауһар», «Айымнұр», «Айғаным», «Айшабибі», «Касаба», «Аналық» сияқты кимешек үлгілерін ұсынды. Әрбір бас киімнің өзіндік тарихы мен мәні бар, олар әйелдердің жас ерекшелігі мен әлеуметтік мәртебесіне қарай әр түрлі үлгіде тігілген.
Енді фестивальді қорытын-дылайтын болсақ, қазылардың ұйғарымымен бірінші орынды №3 балалар мен жасөспірімдер мектебінің маманы Айбын Уахитов жеңіп алды. Екінші орынды «Гидропром» ЖШС менеджері Диана Төлеубаева мен Екібастұз қаласының халыққа қызмет әлеуметтік қызмет көрсету орталығының маманы Айша Ықылас иеленді. Үшінші орын Әйгерім Нұрматова мен №8 сәбилер бақшасының тәрбиешісі Индира Мыңдыбаеваға бұйырды.
Ділназ Серікбай
Суреттерді түсірген: В.Фадеев
