Көктемнің жаршысы, Ұлыстың ұлы күні – Наурыз мейрамы қарсаңында қаламыздағы №5 мектепте ұлттық дәстүрге негізделген кең көлемді мерекелік шара өтті.
Іс-шараға мектеп оқушылары, ұстаздар және ата-аналар қауымы белсене атсалысты. Бұл күні білім ордасы нағыз этнографиялық орталыққа айналды. Әр сынып өз кабинетін мерекелік нақышта безендіріп, дастархан жайды. Наурыз көже әзірленіп, қазақтың дәстүрлі тағамдары ұсынылды. Барлық қатысушылар ұлттық киім киіп, мерекенің сәнін арттырды.
Мерекелік шара барысында оқушылар халқымыздың ежелгі салт-дәстүрлерін сахналап, олардың мән-мағынасын ашып көрсетті. Бір кабинетте жаңа туған сәбиді бесікке бөлеу рәсімі жасалып, бесік жыры шырқалса, енді бірінде тұсау кесу рәсімі орындалып, сәбидің алғашқы қадамдарына ақ бата берілді. Сонымен қатар, келін түсіру мен беташар көрсетілді. Бұл көріністер ата-бабадан келе жатқан дәстүрдің маңыздылығын айқындай түскендей. Қазақтың шашу дәстүрі де ұмыт қалмай, қуаныш бөлісудің көрінісі ретінде сахналанды. Ақ жаулықты әжелер тойдың басталғанын білдіріп, көрермендерге тәттілерден шашу шашты.
Мерекелік кеште оқушылар мен ұстаздар халық әндерін шырқап, күмбірлеген күй орындап, мың бұралған билерімен жиналған қауымды тәнті етті. Сахнада жас өрендер ақындар айтысының үлгісін көрсетіп, атақты жыр-термелерден үзінділер орындады. Шарада Наурыз мейрамының ажырамас бөлігі — ұлттық ойындар да кеңінен қамтылды. Асық ату, арқан тарту, теңге ілу, қазақ күресі сияқты ұлттық ойындар ойнатылып, жарыстар ұйымдастырылды. Бұл сайыстарға оқушылар ғана емес, ұстаздар мен ата-аналар да белсене қатысты. Әсіресе, қол күрес және күміс алу жарыстары көпшіліктің қызығушылығын туғызды. Спорттық жарыстардың жеңімпаздары марапаттарға ие болды.
Мектеп дәлізінде ұйымдастырылған ұлттық қолөнер бұйымдарының көрмесі де көпшіліктің көңілінен шықты. Көрмеге қойылған киіз үй макеттері, зергерлік әшекейлер, ою-өрнекпен безендірілген тұрмыстық бұйымдар мен оқушылар тоқыған кестелер қазақ мәдениеті мен тұрмысының сән-салтанатын паш етті.
Шара соңында әр сыныптың шығармашылығы мен дайындығы ескеріліп, үздік деп танылғандар марапатқа ие болды. Барлық қатысушыларға алғыс хаттар табысталды.
— Наурыз — халқымыздың бірлігін нығайтып, ұлттық сананы жаңғыртатын мейрам. Бұл шара тек мерекелік көңіл-күй сыйлаумен шектелмей, өскелең ұрпақтың ата-бабасының салт-дәстүрін құрметтеп, қастерлеуіне жол ашады, — деп түйіндеді №5 ЖОББМ директоры Наталья Зеленкевич.
Ділназ Серікбай
