Наурыз — табиғаттың жаңаруы мен берекенің бастауы. Осы тамаша мереке шеңберінде қалалық тұрғын үй инспекциясы ұйымдастырған «Біздің ауланың Наурызы» байқауы тұрғындардың ерекше ықыласын тудырып, қаланың әр бұрышын мерекелік көңіл-күйге бөледі. Байқау аулалардың көркін ашып қана қоймай, ұлттық салт-дәстүрді дәріптеуге, көршілер арасындағы ауызбіршілікті нығайтуға септігін тигізгені анық.
Байқау аясында көп қабатты үйлердің тұрғындары өз аулаларын ерекше сәндеп, ұлттық нақыштағы безендірумен мерекенің ажарын аша түсті. Бірі қазақтың ою-өрнегімен көмкерілген киіз үйлер тігіп, ақ дастархан жайса, енді бірі ұлттық ойындар ұйымдастырып, ән мен биден шашу шашты.
Бұл мерекеде көшпенділердің тұрмысынан сыр шертетін көріністер де ерекше назар аудартты. Мәшһүр Жүсіп көшесіндегі 37 «Г» үйдіңтұрғындары аулаларына жылқы әкеліп, қазақ үшін қасиетті және жеті қазынаның бірі саналатын жылқының маңызын ерекше көрсетті. Атты айнала қоршап тамашалаған балалар оны сипап көріп, ересектер жылқы түлігінің қазақ мәдениетіндегі орны туралы тағлымды әңгіме өрбітті.
Ал М.Әуезов көшесі, 101-үй тұрғындары көшпенділердің сенімді серігі саналатын тазыларыналып шығып, қонақтарды аңшылық дәстүрдің қыр-сырына қанықтырды. Тазылардың жүйріктігі мен аңшылықтағы тапқырлығы туралы қызықты деректер айтылды.
Мерекелік шара барысында тұрғындар ұлттық ойындардың көрігін қыздырды. Арқан тарту, асық ату, ләңгі тебу секілді ойындар өткен шаққа саяхат жасағандай әсер қалдырды.
Қазылар алқасы 19-21 наурыз аралығында қатысушылардың дайындығын саралап, аулалардың безендірілуін, тұрғындардың белсенділігін және ұлттық дәстүрлерді дәріптеу деңгейін бағалады. Жеңімпаздар 22 наурыз күні «Қазақстан» орталық алаңында марапатталды:
Бас жүлде (250 мың теңге) — М.Мәметова көшесі, 54/1,2,3,4 үйлер;
I орын (200 мың теңге) — Мәшһүр Жүсіп көшесі, 37 «Г» үй;
II орын (150 мың теңге) — М.Әуезов көшесі, 101-үй және Қ.Сәтбаев көшесі, 37/3 үй;
III орын (100 мың теңге) — М.Әуезов көшесі, 63/3 үй;
Белсенді қатысқаны үшін марапат — 50 мың теңге ақшалай сыйлық — Ломоносов көшесі, 31-үй.
Суреттерді түсірген: автор
