Жер-дүние жаңарып, Самарқанның көк тасы еритін ғажап мезгіл — Наурыз мейрамы биыл кеншілер қаласында ерекше аталып өтті. «Көрісу күні», «Ұлттық киім күні» сияқты атаулы күндерден құралған онкүндік күнтізбемен нақышталған мейрам 22 наурыз күні орталық алаңда қорытыланды.
Бұл күнгі мереке дәстүрлі киіз үйлер байқауымен қызық, өйткені қатысушылар жылда бірінен-бірі асып түсу үшін барын салады. Бұл орайда жылда бәйгенің алдын бермей келе жатқан «Богатырь Көмір» ЖШС биыл да жұртшылықты таңғалдыра білді. Кәсіпорын ауласының оң қанатындағы шарбақтан төрт түлік мал көзге жылыұшырайды. Ер қанаты — атты да, Зеңгі баба баласы — түйені де осы жерден табасыз. Ұлттық киім киген арулар, суырып салма жыр төккен ақын, қару асынған батыр — бәрі де қазақ халқының бай мәдениеті мен салт-дәстүрінің бәсін биіктете түскен жайы бар. Жыл сайын әр киіз үйге белгілі бір тақырып берілетіні белгілі, биыл богатырьліктердің еншісіне Бауыржан Момышұлының есімін ұлықтау бұйырыпты. Мемлекеттік тілді дамыту бөлімінің басшысы Манар Ерботина келушілерді арнайы шатырға бастап жүрді. Шатыр іші әп дегенде көз алдыңа соғыс госпиталін елестетеді: ондағы жаралы жауынгерлер бейнесі нанымды шығыпты. Екінші жағынан, экранда Бауыржан Момышұлы туралы фильм көрсетілуде. Жалпы, мұнда Бауыржан батыр туралы мәліметтер молынан берілген, киіз үй ішінде де, аулада да көрнекі ақпарат аз болмады. Кәсіпорын әзірлеген фотоаймақ та көз тартарлық: онда Наурыз баннерінің түбіне қатарланған теңделген шөп пен күн сәулесіне маужыраған төбет дәп бір ауылда жүргендей әсер сыйлайды…
Ғалым, ағартушы Шоқан Уәлихановтың есімін насихаттауды көздеген «KEGOC» АҚ «Қазақтың ұлы тұлғалары» атты викториналық тақта әзірлепті. Келушілерге тақтада жасырылған сурет иесін табу ұсынылып, дұрыс тапқан адамдарға шағын сыйлықтар берілді.
«Шығыс» кенішінің киіз үйінен әуелеген Майра Уәлиқызының әнінен бұл кәсіпорынға бөлінген тақырыпты жазбай тануға болады. Кәсіпорын қызметкерлері Павлодардағы Майра Шамсутдинова атындағы ән-өнер шығармашылығы мұражай-үйімен байланыс жасап, Майраның творчествосын тарқатуға барын салыпты.
Сонымен қатар, қазақтың әшекей бұйымдарына арналған көрмедегі көне бұйымдар туралы да әңгіме шертілді. Есік алдындағы бүркіт ұстап, тазы жетелеген жігіттер де «Шығыс» наурызының шырайын арттыра түсті.
Екібастұз қаласының педагогтар қауымы биыл жұртшылықты 16000 тал қызғалдақпен таңдай қақтырды. «Наурыз — шешеκ» акциясы аясында ұстаздардың жұқа киізден жасаған жауқазын гүлдері табиғаттың оянуын меңзеп, қазақ еліндегі бірлік пен татулықты насихаттады. Көз жауын алған қызылды-жасылды гүлдер киіз үй қонақтарына тарту етілді.
Білім бөліміне қарасты аумақта, сонымен қатар, басқұр тоқу шеберлері сап түзеді. Қолөнер шеберлері станок қолдана отырып киіз үй жабдықтарын тоқыды. Атап өтерлік жайт, «Қайнар» ББК-де бұл мақсатқа он станок сатып алынып, қазіргі уақытта қала мектептері үшін шеберлік сыныптары өтіп жүрген көрінеді.
Киіз үйлер байқауын қорытындылар болсақ, бас жүлдені (200 мың теңге) «Богатырь Көмір» ЖШС жеңіп алса, 1-орынды (150 мың теңге) «Шығыс» кеніші еншіледі. 2 (100 мың теңге) және 3-орындарды (50 мың теңге) тиісінше «Екібастұз МАЭС-2 станциясы» АҚ мен «Болат Нұржанов атындағы Екібастұз МАЭС-1» ЖШС қанжығалады.
Жалпы, биылғы Наурыз кең ауқымда аталып, оның мәнді-мазмұнды өтуіне «Атамұра» мәдениет орталығының ұжымы мен қала педагогтары зор үлес қосты. Олар бір күндік науқанмен шектелмей, ұлттық мейрамды насихаттау жұмысын жүйелі жүргізді. Осы еңбектері үшін «Атамұра» — «Ең үздік мәдени орталық», Екібастұз қаласының білім бөлімі «Ең үздік білім қазынасы» номинациясымен марапатталды.
Спорттық сайыстарсыз мерекенің сәні кірген бе? Бұл жолы да қазақ күресі, асық, ләңгі тебу, садақ ату, арқан тарту, қол күресі, гір спорты, қошқар көтеру сайыстары тартысты өтті. Бозкілемдегі белдесулерде басым түскен Дәурен Закариев «Түйе палуан» атанып, 200 мың теңге ақшалай сыйлыққа ие болды. 30 үміткер бақ сынаған қошқар көтеру сайысында қошқарды 200 рет көтерген Қожахмед Рахымбердин үйіне қошқар жетектеп қайтты.
Асық атуда 1-орынға ие болған Руслан Жапаров бұл күні марапат сахнасына бір емес, екі рет шықты. Көпшіліктің арасынан қазақы шапан, түлкі тымағымен ерекшеленген Русланды әңгімеге тарттық. Ол «Шығыс» кенішінің технологиялық кешен учаскесінде конвейер машинисі болып еңбек етеді екен. Түнгі ауысымнан шыққанына қарамастан, кеніш киіз үйінің ауласындағы ұйымдастыру жұмыстарына да, асық атуға да белсенді қатысыпты. Аулалар арасындағы байқауда Мәшһүр Жүсіп көшесі, 37 г үйдің 1-орын алуында да Русланның еңбегі ерен. «Көршілер жиылып самауыр қойып, ауладағы киіз үйде ауызашар шайын ішеміз», — дейді кенші. Сондай-ақ, «Шығыс» кенішінің киіз үйлер байқауында 1-орын алуы Русланды бүгіндікке қуантқан үшінші жеңіс деуге болады.
Жалпы, бұл күні орталық алаңға 2025 жылғы мерейтойларға арналған 15 киіз үй құрылып, Алтынай Жорабаева, Қуандық Рахым, Айбар Серкебаев сынды эстрада әншілері мен «Алатау серілері» тобы өнер көрсетті.
Болат Аманбаев, «Қазақстан» телеарнасының тілшісі, Қазақстан журналистер одағы Павлодар облыстық филиалының директоры:
— Ертеде Әз-Наурыз ынтымақ пен бірліктің ғана емес, берекелі тірліктің темірқазығы ретінде де насихатталған. Ұлтымыздың ұлық мейрамы һәм елдің ұйытқысы бола білген тамаша мерекені екібастұздық тұрғындар мейлінше сезінді деп ойлаймын. Қыстан қысылып шыққан ел-жұрт қардың көбесі енді сөгіліп, күн сығалай шуағын төккенде табиғат анадан да, елге тұтқа болған ақ жағалылардан да жақсылық күтеді. Болашаққа үмітпен қарайды. Түптеп келгенде, Наурызды сән-салтанатымен атап өту — тек думан-той емес, салт пен сананы жаңғырту, елдің бірлігін бекемдеу. Бұл тұрғыда екібастұздықтардың әр ісінен жылылық пен қарапайымдылықты сезінемін. Қазақстанда қызыл кітапқа енген сирек кездесетін қызғалдақ гүлдерді Наурыз мерекесінің нақышына айналдыра біліпті. Қолдан жасалған қызғалдақтарды көңілден шығып, көңілге жеткен дүние деп қабылдадым. 2025 жылдың жұмысшы мамандықтар жылы болып жарияланғаны белгілі. Бұл идеяны да кеншілер мен энергетиктер қаласы ұтымды пайдаланып, орталық алаңда кәсіптік және техникалық мамандықтар көрмесін ұйымдастырды. Меніңше, бұл — қолдауға лайық бастама! Ақиқатында, мәдени шара ғана емес, мемлекеттік мерекелерді өткізуден де Екібастұз қаласының бәсі жоғары болып тұр!
Ж. ҚАДЫРОВА
