Бүгінде үйде отырып, қолөнермен айналысатын кәсіпкерлер қатары көбейді. Ескірмейтін өнерді игерген шеберлер ұлттық нақышты мерекелік киім-кешек, көрпе-төсекке ғана емес, күнделікті тұтынатын заттарға да қондыра бастаған. Бүгінде тойшыл қауым көп іздейтін тойбастар, бонбоньеркалар да қазақша өрнекпен түрлене қалыпты. Қолөнер шеберлері ұмытыла бастаған басқа да дүниелерді жаңартып, халыққа ұсынуда. Қуантатыны — төл мәдениетімізді жаңғыртып, заманауи рең беруде. Мұндай дүниелерге сұраныста күн сайын артып келеді.
Тігін ісін құрақ көрпеден бастаған кәсіпкер Гүлнұр Нұрсамбаева қолөнер бұйымдарын көбіне тапсырыспен жасайды. Қолөнерге дендеп кіріскеніне 7-8 жыл болыпты. Бүгінде қыз жасауы, қоржын, қазақша костюмдерден бастап сәнді себет, тойбастар, тұсау кесер мен қыз ұзату ғақажетті ұсақ дүниелерге дейін ұсынатын шебер мереке күндері іс тігуден мүлде бас көтермейді.
— Клиент қалауын жылдам орындауды ойлап, кейде суретін парақша масалуды да ұмытып кетемін. Әдетте тұтынушы нені сұраса, соны жасап беруге дағдыланғанмын. Қазір де Наурыз тойы қарсаңында мектептер мен балабақшалардан түскен тапсырысты тігіп жатырмын, — дейді іс арасында сұрағымызға жауап берген Гүлнұр. — Көктем мерекесі қарсаңында жұмыс көбейеді. Әрі тұтынушының да талғамы артқан, өзгеше дүниені қалайды.
Ісмердің айтуынша, маңдайшасына моншақ тағып, кестеленген тақиялар сәннен шықпайды. Оны әр жыл сайын түрлендіруге болады. Дәл сондай өрнекті масаты жеңсіздің өңіріне қондырса – мерекелік киім дайын. Этноөрнек басылған әмиянды туған кунге, айт мерекесіне сыйлауға болады. Қызкеліншектерге арналған қораптағы сабын раушандар да ерекше эстетикалық сыйлық. Бұдан басқа, балабақша бөбектеріне арналған ойыншықтары да көз тартарлық. ойыншықтары да көз тартарлы. Онысына еліміздің әр аймағынан тапсырыс беретін клиенттері де риза.
— Бірнеше жылдан бері сыпыра да хит тауарлардың біріне айналды. Әуелгіде еттің жаймасы, шелпек жаюға арнап тігетінмін. Қазір алжапқыш және соларды салатын сөмкесін толық жинақ ретінде ұсынамын. Бұл клиент үшін де ыңғайлы әрі ұтымды, — дейді Ісмер.
Қолөнерді кәсіпке айналдырған тағы бір ісмеріміз Меруерт Жұмашева нарықта тұрмыстық заттарға сұраныс көбейгенін айтады.
— Қазір жұрт бұрынғыдай желетке, көйлек, бесік жасауына ғана емес, ыдыстың сыртына арналған аяққапқа, диван және орындық жапқыштарына, перделерге тапсырыс береді. Күнделікті көлікте пайдаланатын кішкентай жастықшалар, валиктер де өтімді. Және соның бәрі ұлттық нақышпен орынды үйлесуін қалайды. Соңғы кездері тұтынушылар ас үйге қатысты дастархан, ыстықтамақ салынған ыдыстың астына қоятын төсемелер, салфеткаларды жиі сұрайды. Клиенттер тарапынан жаңа идеяларды қуана құп аламын. Мұндай ұсыныстар шығармашылығымызды шыңдайды, — дейді жаңалыққа жаны құмар Меруерт.
Өз білгенін өзгелермен бөлісуді мұрат еткен Меруерт ұлттық өнерді насихаттап, тегін шеберлік сағаттарын өткізеді. Облыстық байқауларға қатысып, жүлдегер атанып жүр.
Ұлттық құндылықтар қолданбалы өнер арқылы ұрпақтан-ұрпаққа аманатталып келген. Қазақы нақыштар жаңғырып, дәстүрлі және сәндік бұйымдарда көрініс тапса, төл болмысымыздың өрісі кеңейе түспек.
Гүлсана Медеубай
