Ақпан айының ортасында су тасқыны сияқты төтенше жағдайларға техниканың дайындығы тексерілген болатын. Наурыз айында күн жылынуына байланысты дайындық жұмыстары тағы бір пысықталды. Яғни, су тасқынының алдын алу мәселесі күн тәртібінен түскен жоқ.
Өңірдегі төтенше жағдайды жою үшін жергілікті атқарушы орган 136 техника, 20 мотопомпа, 1 жылжымалы сорғы станциясын дайындап отыр. Екібастұз гарнизонында 7 жылжымалы мотопомпа, 1 тіркемелі мотопомпа, 2 негізгі техника, 1 арнайы техника, 4 жүзгіш құрал бар. Су тасқыны туындаған жағдайда Төтенше жағдайлар департаментінен қосымша күш-көмек жіберіледі.
— 2024 жылы Екібастұз қаласы әкімдігі 2 мотопомпа, 9 тіркемелі цистерна сатып алған болатын. Павлодар облысы азаматтық қорғаныс басқармасы Екібастұзға қуаты секундына 130 литр сорғы станциясын берді. Жаңа жылда 10 мотопомпа сатып алынды. Бұдан басқа қосымша құрылғыларды сатып алу үшін конкурс жүргізілуде. 4610 қап, 4765 тонна инертті материал дайындалды, — дейді бұл туралы ТЖ басқармасы бастығы А.Құсайынов.
Асхат Құсайыновтың айтуынша, барлық техника төтенше жағдайға сақадай сай. ТЖ аумағындағы тұрғындарды көшіруге орындар әзірленген.
— Бүгіннен бастап күн жылып келеді. Бұл қар мен мұздың тез еруіне әкеп соғады. Сондай-ақ, Өлеңті өзені таситын болса, жақын маңдағы Қаражар, Талдықамыс, Тай ауылдары тұсындағы топырақ үйінділерін су шайып кету ықтималдығы бар. 12 наурызда осы мәселелерге қатысты су тасқынының алдын алу жөніндегі қалалық комиссия отырысы өтті, — деген А.Құсайынов қар суы ерігеннен бастап өзен маңындағы елді мекендерді үнемі бақылауда ұстайтынын айтты.
Оның айтуынша, су басу қаупі былтыр Бәйет пен Қоянды ауылында орыналған. Қазіргі кезде осы елді мекендерде қардан тазалау жұмыстары қызу жүруде.
Басқарма бастығы брифингте түтіннен улану фактілері туралы да айтып өтті. Кеше ғана 207-кварталдағы бір үйден 5 адам түтінге тұншығып, өмірлеріне қауіп төнген. Осы орайда ТЖБ қызметкерлері тұрғындарға пештегі отқа абай болуды ескертті.
Кенже ҚУАТ
