Қалалық коммуникациялар қызметінде өткен брифингте Екібастұз қалалық ауруханасы басшысының орынбасары Светлана Подзорова стационарға жатқызуды ұйымдастыру тәртібі жөнінде баяндады.
— Стационарлық емдеу екі жағдайда жүзеге асырылады — шұғыл және жоспарлы түрде. Шұғыл түрде науқас тәулік бойы: жәдел жәрдеммен жеткенде, өздігінен жүгінгенде, шұғыл тәртіппен емханадан жіберілгенде қабылданады. Көп адам «дене қызуы не қан қысымымен келсем, міндетті түрде ауруханаға жатқызуы тиіс» деп ойлайды. Содан қабылдау бөлмесіндегі дәрігермен арада түсініспеушіліктер туындап, жанжал шығады. Шын мәнінде ауруханаға келген науқастың дене қызуын, қан қысымын, т.б. қабылдау бөлімінде қалыпқа түсіру мүмкін болса, дәрігер науқасты әрі қарай терапиялық ем қабылдау үшін емханаға жібереді. Қатты ауырсыну, созылмалы аурулардың өршуі, жарақаттар, тоқтамай қан кету, стационарлық бақылауды қажетет етін басқа да жағдайлар болғанда ғана науқас ауруханаға жатқызылуы тиіс, — деп түсіндірді Светлана Валерьевна.
Стационарға жоспарлы түрде жатқызылатын науқастар міндетті түрде емхана жолдамасымен және үзінді көшірмемен күннің бірінші жартысында келуі тиіс. С.Подзорова мұны науқасқа анестезиолог дәрігердің (егер ота жасау қажет болса) кеңесі немесе терапевтің қосымша тексерулері қажет болуы мүмкін деп түсіндіреді.
Емдеу хаттамасы талаптарына сәйкес талдаулар толық болмаса, сондай-ақ, емделуші ЖРВИ жұқтырып, ілеспе созылмалы ауруы қозып, қандағы қант мөлшері күрт көтерілсе, тіпті жолдама коды сәйкес келмесе де пациент жоспарлы емге жіберілмеуі мүмкін. Науқасты жоспарлы емге жатқызуға дайындауға емхана жауапты.
Жалпы ауруханаға жатқызу:
1) ТМККК (тегін медициналық көмектің кепілдік берілген көлемінің тізбесі) шеңберінде;
2) МӘМС (міндетті әлеуметтік медициналық сақтандыру) жүйесінде;
3) ақылы негізде;
4) ерікті медициналық сақтандыру шеңберінде;
5) есептелген медициналық сақтандыру шеңберінде жүзеге асырылады.
Қазіргі уақытта ауруханада ақылы (сервистік) бөлімшелер жоқ.
Тағы бір мәселе, бұған дейін стационарлық емдеуге жатқызылатын бір қатар аурулар енді емханалық жағдайда бақылауға алынатын болған. Бұл — Денсаулық министрлігі енгізген өзгеріс. Кейін енгізілген осы тәртіпке сәйкес, сауығу динамикасы байқалған демікпе, қан қысымы, бауыр циррозы, т.б. ауруы бар науқастар да емханада қаралады. Терапевтік ем тиімсіз деп табылғанда ғана пациент ауруханаға жатқызылады.
— Қабылдау бөлімшесі тәулік бойы жұмыс істейді. Кезекші дәрігер науқастың жағдайын көріп, ауруханаға жатқызатынын не жатқызбайтынын шешеді. Күн сайын бөлімшеге 100-ден аса адам келеді. Осыдан-ақ кезекші дәрігерге қаншама салмақ түсіретінін байқау қиын емес. Сондықтан тұрғындарды шыдамдылыққа шақырғым келеді, — деді Светлана Валерьевна сөз соңында.
Пациенттерді стационарға жатқызу кезінде туындаған мәселелерге қатысты сұрақтарыңызға (ересектер мен балалар) 8 707 270 0103 ватсап нөмірінен жауап ала аласыз.
